Enn er frúin ein í kotinu, og verður það næstu 36 tímana eða svo.

Reyndar hefur hún sérstaklega mikið fyrir stafni þessi frú þangað til herrans er von innum dyrnar á slotinu. En ekki nánar út í það í bili.

Tíminn hefur hins vegar verið nýttur ákaflega vel þessa fáu daga sem frúin hefur þurft að hafa ofan af fyrir sjálfri sér og hefur henni tekist að rækta samband sitt við allmarga vini sína. Sem er auðvitað af hinu góða. Maður verður að passa upp á það. Í kvöld var förinni til dæmis heitið á einn af betri veitingastöðum bæjarins og þar á eftir í kvikmyndahús á stelpumynd. Spændende.

Þegar heim var komið rakst frúin á sameiginlega vin hennar og herrans, sem kíkti við og voru flest vandamál heimsins leyst á þeim tveimur klukkutímum sem samtalið varði. Magnað. Nú þarf bara að koma þessu í framkvæmd.

Því er ekki að leyna að hér situr við skriftir klukkan tvö aðfararnótt mánudags lítil frú sem saknar herrans síns. Komdu heim minn kæri, komdu heim.

Umm daaa...

Hver man ekki eftir línunni?

Frúin er enn og aftur ein í kotinnu. Þannig er mál með vexti að herrann fór ásamt fríðu föruneyti til Skotlands að hlusta á tónlist. Það er auðvitað ekki nóg að fara bara á tónleika á Ísalandinu góða, heldur þarf herrann auðvitað að bregða sér utan í þriðja skiptið á því herrans ári 2004 til að njóta fagurra tóna hinna ýmsu listamanna.

Á síðastliðnu ári hefur pilturinn verið viðstaddur eftirfarandi tónleika:
David Bowie
Muse
Foo Fighters
Violent Femmes
Damien Rise
Starsailor
Placebo*2
Kraftwerk
Pixies
... og örugglega fleiri sem ég er að gleyma.

Síðan er eftir að fara á neðangreinda tónleika:
50 cent
Pink
Franz Ferdinand
Lou Reed
Van Morrisson
The Shins
Keane
Allt heila klabbið á T
... og örugglega fleiri ef ég þekki hann rétt.

Allt kostar þetta sitt og hefur frúin þurft að una við það að fá einungis að borða einu sinni á dag, og þá yfirleitt bollasúpu, banana, epli, núðlur eða hrísgrjón.

Já, það er illa farið með mann.

Annars er það mest svekkjandi í fréttum, fyrir utan það að fá ekki að fara með til Skotlands, að frúin skuli þurfa að sitja inni í dag - föstudaginn 9. júlí - þegar sennilega er verið í sama mund að setja hitamet í höfuðborginni.

Já, það er illa farið með mann.

Nú er rétti tíminn til að punkta hjá sér stöðu ritgerðarsmíða.

Búiin að skila tvisvar - allt í allt 15 bls. Undirtektir leiðbeinanda hafa verið nokkuð góðar.

Næstu skil eru áætluð föstudaginn 9. júlí nk. og svo verður fundur með leiðbeinandanum mánudaginn 12. júlí. Annar fundur með leiðbeinandanum verður svo föstudaginn 16. júlí en eftir það fer leiðbeinandinn í frí til 16. ágúst. Fyrir þann tíma þarf að vera búið að senda síðustu kaflana svo hægt sé að hafa fund.

Já, þetta var nú allt og sumt.

Í dag hefur frúin setið við skriftir og sett niður á blað svona ca. 3 síður eða svo. Reyndar er eftir að skoða athugasemdir leiðbeinandans og bæta þar úr. Ætli það verk verði þó ekki látið sitja á hakanaum, að minnsta kosti svona fyrst um sinn.

Það er langt síðan frúin sá sér fært að skrifa nokkuð inn á þessa síðu, enda fátt sem hefur á daga hennar drifið.

Nú er svo komið að skriftir á lokaritgerð eru hennar helsta hlutskipti í lífinu, og kann hún því misvel.

Að öðru leyti er allt með kyrrum kjörum. Frúin fór ásamt herranum í smá kvöldgöngu í gær og var förinni heitið til vinahjóna sem eru í þann mund að flytja heimili sitt um heila 6 kílómetra. Alls kyns hluti þurfti að bera úr íbúðinni, sem er staðsett á þriðju hæð, og inn í forláta sendiferðabíl. Síðan þurfti að ferja allt hafurtaskið í póstnúmer 113 og bera það aftur upp á þriðju hæð. Reyndar vildi svo vel til að í hinum nýju híbýlum er að finna lyftu sem kom að ómældu gagni við flutningana.

Foreldrar frúarinnar tóku sig svo til og yfirgáfu landið í nótt, en ekki þó án þess að bjóða frúnni og hennar maka í mat - síðasta kvöldmáltíðin so to speak. Var þar boðið upp á yndælis kínverska rétti og hrísgrjón í hávegum höfð. Frúin fór svo ekki tómhent frá þessum veisluboði heldur tók hún með sér páfagauk litlu fjölskyldunnar, sem mun vera í pössun næstu þrjár vikurnar.

Fuglinn virðist una hag sínum vel í nýju heimkynnunum. Er kominn út úr búrinu og spígsporar um allt milli þess sem hann rífst við dagblöð og nartar í fætur frúarinnar. Það er sennilega sældarlíf að vera páfagaukur.